Algúns nomes ficaron gravados na historia do convento e mosteiro. Temos que comezar pola primeira abadesa, Sor Leonor González. A tradición entre as monxas é a de que está enterrada dentro do convento, se ben se descoñece o lugar. E aquí resulta ben suxestivo aquel sepulcro cun baixorrelevo semellante a un báculo, que ben podería ser o seu, sinalando a primeira calidade abacial.
PERSONAXES DE SANTA CLARA
Está tamén enterrada no mosteiro a abadesa Sor María de Santo Antonio, falecida en 1616 e de historia ben curiosa. Ante a negativa familiar a que profesase e entrase na Igrexa vestiuse de home, escapou e ingresou en orde masculina, na de San Francisco, de xeito que por tempo de cinco anos ninguén se decatou da súa condición. Desfeito o engano recalou no convento das clarisas de Pontevedra, onde chegou a ser abadesa, sendo enterrada a carón do altar da Virxe dos Desamparados.
Son varias as familias relacionadas co mosteiro, quizais unha das máis destacadas a dos Mariño de Lobeira, unha das principais liñaxes do reino medieval e moderno de Galicia e que eran patróns da capela do altar maior da igrexa de Santa Clara.
A historia entrecruza tamén as monxas de Santa Clara cun dos principais ilustrados galegos: o Padre Frei Martiño Sarmiento. Cando se produce a invasión inglesa da ría de Vigo en 1702, ante o perigo dun ataque a Pontevedra, Sarmiento foxe “coas corenta monxas de Santa Clara”, para se refuxiaren en Santa Clara de Santiago.
Porque o coidado da vida no mosteiro non sempre foi sinxelo, e cocíñase no edificio, nas monxas e na súa herdanza. E que mellor lugar para conservala que o Arquivo. Coñecemos o nome de dúas arquiveiras da institución Sor María Guillerma de San Bernardo e Sor Catalina de San Ignacio, custodias da documentación e patrimonio a mediados do século XVIII.
E así as clarisas en Pontevedra chegan a hoxe. Sor Sagrario e Sor Purificación, cos seus oitenta anos, foron as derradeiras monxas de clausura de Santa Clara. O convento, o mosteiro, fechouse para a comunidade pero abriu o seu encanto e patrimonio á sociedade.